کتاب و سنت ڈاٹ کام ادارہ محدث کی پیش کش ہے۔ یہاں موجود تمام اسلامی مواد محدث کے علمائے کرام کی باقاعدہ اجازت اور تصدیق کے بعد شائع کیا جاتا ہے۔ الحمدللہ، اللہ تعالٰی نے ہماری اس چھوٹی سی کاوش کو انٹرنیٹ پر بہت مقبولیت بخشی۔ کئی علمائے کرام سے ہمارے روابط اس ویب سائٹ کے ذریعے سے استوار ہو گئے۔ عوام کی ایک بڑی تعداد نے ہمیں سینکڑوں کی تعداد میں ای میلز کیں۔ جن میں تنقید بھی تھی، مشورے، نصیحتیں اور فرمائشیں بھی تھیں اور خراج تحسین بھی۔ ہم ان سب بہن بھائیوں کے مشکور ہیں جو اس سفر میں قدم بہ قدم ہماری حوصلہ افزائی فرماتے رہے۔ یہ سیکشن ہم نے مخصوص کیا ہے کہ آپ معزز قارئین کو ہماری مصروفیات کی اطلاع ہو۔ ہم ان شاء اللہ درج ذیل پراجیکٹس پر کام کر رہے ہیں۔

اردو یونی کوڈ قرآنی تراجم و تفاسیر سیکشن: اس سیکشن میں ہم ان شاء اللہ قرآن مجید کے تمام مستند تراجم و تفاسیر کو شامل کرنے کا ارادہ رکھتے ہیں۔ آپ ان تراجم و تفاسیر کو ان شاء اللہ اردو یونی کوڈ اور پی ڈی ایف فارمیٹ میں ڈاؤن لوڈ بھی کر سکیں گے اور آف لائن ہونے کی صورت میں مطالعہ اور سرچ کر سکیں گے۔ نیز دوست و احباب سے یہ ورڈ اور پی ڈی ایف فائلز شیئر کر سکیں گے۔ اسی طرح آپ آن لائن کسی مخصوص آیت کا ترجمہ و تفسیر بھی بآسانی ملاحظہ فرما سکیں گے۔ نیز سرچ کے بہت سارے آپشن دستیاب ہوں گے، جن کی مدد سے ایک عام آدمی بھی بآسانی اپنی مطلوبہ آیت تک اردو یا عربی الفاظ کی  سرچنگ کے زریعے پہنچ پائے گا۔ مثال کے طور پر سود سے متعلقہ تمام آیات اور ان کے تراجم و تفاسیر آپ سرچنگ کے زریعے یکجا دیکھ پائیں گے۔

اردو یونی کوڈ احادیث پراجیکٹ: اس سیکشن پر ہم کام شروع کر چکے ہیں الحمدللہ، اور ان شاء اللہ سال ۲۰۱۰ کے شروع میں آپ صحیح بخاری، صحیح مسلم یعنی صحیحین اور کتب اربعہ یعنی جامع ترمذی، سنن ابن ماجہ، سنن ابو داؤد، سنن نسائی اردو یونی کوڈ اور پی ڈی ایف فارمیٹ میں ڈاؤن لوڈنگ نیز آن لائن مطالعہ و سرچنگ کی سہولیات کے ساتھ دیکھ پائیں گے۔ ہماری بھرپور کوشش ہے کہ ہم ان کتب کے علاوہ بھی دیگر کتب احادیث یعنی موطا امام مالک اور مسند احمد وغیرہ کو اس ذخیرہ میں شامل کریں۔ الحمدللہ، کتب احادیث کے جدید و مستند اردو تراجم تخریج و حکم حدیث کے ساتھ موجود ہیں۔ ہم ان شاء اللہ اپنے قارئین تک ان کی فراہمی کو جلد ممکن بنائیں گے۔ اگرچہ اس سلسلے میں دیگر احباب نے بہت اچھی کاوشیں کی ہیں اور ہم ان کے ممنون ہیں کہ انہوں نے ہماری توجہ اس کام کی طرف دلائی۔ لیکن یہ کوشش اس لحاظ سے مفید تر اور منفرد ہوگی کہ ہر ہر حدیث کے ساتھ عامی کو اس حدیث کے صحیح، حسن یا ضعیف ہونے کا اشارہ مل جائے گا۔ نیز عربی میں اس کے ضعف کی وجوہ بھی ممکنہ طور پر دستیاب رہیں گی۔

درج بالا دونوں پراجیکٹ ہم چند افراد کی ٹیم کیلئے بہت بڑے ہیں۔ لیکن اللہ رب العزت سے امید ہے کہ وہ ہمیں ہماری اس کوشش میں سرخرو فرمائیں گے۔ اگر ہمارے قارئین میں سے کچھ لوگ ٹائپنگ یا پروف ریڈنگ کے کام میں ہمارا ہاتھ بٹانا چاہیں تو ہمیں اس پتہ پر ای میل کریں۔

webmaster  (at)  kitabosunnat  (dot)  com

رسائل و جرائد سیکشن: اس سیکشن کا اجراء تو اگرچہ ہو چکا ہے۔ لیکن اردو یونی کوڈ کی صورت میں آن لائن رسائل کی فراہمی میں ہمیں اس وقت بھی بہت سی تکنیکی مشکلات درپیش ہیں۔ ان رسائل کو پی ڈی ایف میں فراہم کرنا کوئی مسئلہ نہیں۔ لیکن ورڈ فارمیٹ اور آن لائن مطالعہ کی شکل میں فراہمی میں اردو زبان کی وجہ سے کافی رکاوٹیں ہیں۔ ہماری بھرپور کوشش ہے کہ ان خامیوں پر جلد قابو پا کر اس سیکشن کو مستقل اپ ڈیٹ کیا جائے۔ ہمارا ٹارگٹ ان شاء اللہ ہر ہفتے ایک رسالہ اپ لوڈ کرنے کا ہوگا۔ اور پرانے سب شمارے اپ لوڈ ہو جانے کے بعد پھر ہر ماہ ایک رسالہ اپ لوڈ کیا جاتا رہے گا، ان شاء اللہ والعزیز

آڈیو وڈیو سیکشن: اس سیکشن میں دنیا بھر کے قراء کی آواز میں تلاوتیں ، اور اردو زبان میں علمائے کرام کے دروس و تقاریر کو شامل کیا جائے گا۔ ان شاء اللہ۔  یہ سیکشن بھی مواد کے لحاظ سے قریب قریب تیار ہے۔ اگر تکنیکی بنیادوں پر کوئی دشواری پیش نہ آئی تو شاید سب سے جلد اسی سیکشن کو آن لائن کر دیا جائے۔

اسلامک سوفٹ ویئرز: ادارہ محدث کے شائع کئے گئے تمام اسلامی سوفٹ ویئرز سمیت موبائل اور کمپیوٹر پر استعمال کئے جا سکنے والے اسلامی سوفٹ ویئرز کو شامل کیا جائے   گا۔ ان شاء اللہ

آن لائن فتاوٰی: ٹیلی فون، ای میل اور بذریعہ خط و کتابت پوچھے جانے والے تمام شرعی مسائل کا حل کتاب و سنت کی روشنی میں ادارہ کے جید علمائے کرام کی طرف سے پیش کیا جائے گا۔ ان شاء اللہ۔  فتوٰی سروس فی الحال کچھ عرصے کے لئے دستیاب نہیں ہوگی۔ اس کیلئے ہم ان شاء اللہ جدید ٹیکنالوجی کا استعمال کرتے ہوئے بہت ہی منفرد قسم کی فتوٰی سروس شروع کرنے کا ارادہ رکھتے ہیں۔ جن میں فتاوٰی پر مشتمل کتب کو بھی اپ لوڈ کیا جا سکے۔ کیوں کہ ہمارا تجربہ ہے کہ پوچھے جانے والے اسی فیصد سوالات پہلے سے ہی کسی نہ کسی عالم نے خوب دلائل و جزیات کی وضاحت کے ساتھ دے رکھے ہیں۔ بس ان کی فراہمی کو آسان تر بنانے کی ضرورت ہے۔ اور ان شاء اللہ اس کو ممکن بنانے کے بعد ہی ہم اس سروس کو بحال کر سکیں گے۔