السلام علیکم ورحمۃ اللہ وبرکاتہ!

معزز قارئین کرام ۔۔!

ہماری تمام ویب سائٹس(محدث لائبریری، محدث، محدث فتویٰ،محدث فورم، محدث میگزین) اسلامک ویلفیئر ٹرسٹ کے زیر اہتمام قائم معروف تحقیقی ریسرچ سنٹر مجلس التحقیق الاسلامی کی عمارت میں چل رہی ہیں۔ جس کا ہیڈ آفس99۔جے ماڈل ٹاؤن، لاہور میں قائم ہے۔ٹرسٹ کے زیر اہتمام متعدد علمی، تحقیقی اور رفاہی ادارے کام کر رہے ہیں۔ اس شعبے کے نگران ڈاکٹرحافظ انس نضر صاحب، جبکہ انتظامی ذمہ دار قاری محمد مصطفی راسخ صاحب ہیں۔اس وقت مجلس التحقیق الاسلامی کی عمارت میں موجود پرشکوہ لائبریری کے ساتھ ساتھ پانچ مختلف ویب سائٹس آن لائن ہیں، جن کی تفصیل درج ذیل ہے:

محدث لائبریری (KitaboSunnat.com)

یہ ویب سائٹ اردو زبان میں اسلامی کتب کی پی ڈی ایف فارمیٹ میں دنیا کی سب سے بڑی ویب سائٹ ہے۔والحمد للہ علی ذلک۔اس سائٹ پر موضوعاتی انڈیکس کی سہولت کے ساتھ ساتھ پی ڈی ایف فارمیٹ میں کتب کو پیش کیا جاتاہے۔اس سائٹ کو یہ اعزاز حاصل ہےکہ اس پر روزانہ تین نئی کتب آن لائن کی جاتی ہیں۔یہ ویب سائٹ 2008ء سے جاری ہے۔اس سائٹ کے یومیہ زائرین کی تعدادتقریبا پندرہ سے بیس ہزار ہوتی ہے، جو دنیا بھر کے ممالک سے تعلق رکھتے ہیں۔اس سائٹ پر اب تک تقریباً ساڑھے نو ہزار(9500)کتب پی ڈی ایف فارمیٹ میں اپلوڈکی جا چکی ہیں، جو آن لائن مطالعہ اور فری ڈاؤن لوڈنگ کی سہولت کے ساتھ موجود ہیں۔اس سائٹ کی ایک بڑی خوبی یہ بھی ہے کہ دنیا بھر سے تعلق رکھنے والے زائرین کی فرمائش کے مطابق مطلوبہ کتب بھی اپ لوڈ کی جاتی ہیں۔

خصوصیات

محدث (Mohaddis.com)

یہ سائٹ اردو زبان میں خدمت حدیث شریف کے سلسلے میں ایک عظیم الشان قدم ہے۔یہ ویب سائٹ اہل علم کے ہاں معروف حدیث کے عربی سوفٹ وئیر مکتبۃ الحدیث المعروف بہ کتب تسعہ کی طرز پر آن لائن سہولت کے ساتھ تیار کی گئی ہے۔اس سائٹ پر احادیث مبارکہ اپنی تمام تر تفصیلات کے ساتھ موجود ہیں، تاکہ عوام الناس بھی حدیث کے حکم سے بخوبی واقف ہو سکیں۔اس سائٹ پر اب تک حدیث کی چھ معروف کتابیں (صحیح بخاری، صحیح مسلم، جامع ترمذی، سنن ابو داؤد، سنن ابن ماجہ اورسنن النسائی) صحاح ستہ اپلوڈ کی جاچکی ہیں،جامع ترمذی کے علاوہ باقی پانچ کتب کے دو دو اُردو تراجم اپلوڈ ہیں، جامع ترمذی کا فی الوقت ایک ہی اردو ترجمہ ہے۔ اس ویب سائٹ کو 2014ء میں بیس رمضان المبارک کو آن لائن کیا گیا ۔اس سائٹ پر موجود کسی بھی حدیث کو سوشل میڈیا پر شیئر کرنے کی سہولت بھی دی گئی ہے۔

خصوصیات

یہ ویب سائٹ متعدد شاندار خصوصیات کی حامل ہے جن میں قاری کو زیادہ سے زیادہ سہولیات فراہم کرنے کی کوشش کی گئی ہے۔ ان میں سے چند معروف خصوصیات درج ذیل ہیں

محدث فتویٰ (Urdufatwa.com)

مسلمانوں کو ہر دور میں اپنے عقائد، عبادات، معاملات، مسلموں اور غیر مسلموں سے تعلقات، داخلی و خارجی اختلافات و نزاعات اور اخلاقیات غرضیکہ ہر شعبہ میں پیش آمدہ مسائل میں علما کی طرف رجوع کرنا پڑتا ہے۔ اور دین میں اس کی اہمیت کے پیش نظر علما بھی خاطر خواہ اس کا اہتمام کرتے رہے ہیں اور کر رہے ہیں۔ اسلام کے ابتدائی ادوار میں فتویٰ نویسی میں کتاب و سنت، آثار صحابہ رضوان اللہ علیہم اجمعین اور تابعین عظام رحمہم اللہ کو بنیاد بنایا جاتا رہا لیکن قرون ثلاثہ کے بعد جب امت مسلمہ گروہی، مسلکی اور تقلیدی جمود کی وجہ سے فرقوں میں بٹ گئی اور ہر مفتی نے اپنے مذہب کے اصول و فروع کے مطابق فتویٰ دینا شروع کر دیا اور براہ راست کتاب و سنت اور دیگر ائمہ مجتہدین کی آرا کو نظر انداز کردیا گیا تو اس طرح کے تقلیدی جمود نے امت کو کتاب وسنت کے چشمہ صافی سے مستفیض ہونے سے محروم کر دیا۔اس کے برعکس اہل حدیث اور سلفی علما کا فتویٰ نویسی میں طریق کار اور انداز مقلدین علما سے بالکل مختلف رہا۔ انہوں نے فتویٰ نویسی میں سلف کے طریقہ کارکو اپنایا اور کتاب و سنت پر اعتماد کرتے ہوئے صحابہ کرام رضوان اللہ علیہم اجمعین و تبع تابعین عظام رحمہم اللہ اور دیگر ائمہ مجتہدین اور فقہائے عظام کے اقول سے خوب خوب استفادہ کیا۔آج کے اس تحقیقی اور سائنسی دور میں جب انٹرنیٹ معاشرے کا جزو لا ینفک بنتا جا رہا ہے اس بات کی شدید ضرورت محسوس کی جا رہی تھی کہ عوام الناس کو ایک ایسا پلیٹ فارم مہیا کیا جائے جہاں وہ اپنے تمام پیش آمدہ مسائل کا آسانی کے ساتھ شریعت کی روشنی میں حل تلاش کر سکیں۔ ’مجلس التحقیق الاسلامی‘ نے ’اردو فتوی ڈاٹ کام‘ سائٹ کا اجرا کیا۔

خصوصیات

محدث فورم (Forum.Mohaddis.com)

انٹرنیٹ کی دنیا میں لوگوں کے باہمی تبادلہ خیالات اور بحث ومباحثہ کی روایت خاصی پرانی ہے۔ بہت سی ویب سائٹس اپنے یوزرز کو یہ سہولت فراہم کرتی ہیں کہ وہ ایک دوسرے کے ساتھ بات چیت کر سکیں اور مسائل کے حل کےلیے ایک دوسرے کی مدد کر سکیں۔ ’مجلس التحقیق الاسلامی‘ نے بھی اپنےقارئین کو ایک ایسا پلیٹ فارم مہیا کیا ہے جہاں تمام اراکین دوسروں کی آرا سے مستفید ہونے کے ساتھ ساتھ ان پر تبصرہ بھی کر سکتے ہیں اور اپنا ما فی الضمیر آسانی کے ساتھ بیان کر سکتے ہیں۔ اس وقت فورم پرتقریبا 35162 موضوعات پر 870802 پوسٹس اور تحریریں موجود ہیں، جس میں ہر گزرتے لمحے اضافہ ہوتا جا رہا ہے۔اس وقت فورم کے رجسٹرڈ ممبران کی تعداد 5322 سے زائد ہے، جس میں مسلسل اضافہ ہو رہا ہے۔انٹرنیٹ کی دنیا میں اسے ایک بہترین سلفی اور دعوتی فورم تسلیم کیا جاتا ہے۔یہ کتاب وسنت کی روشنی میں فہم سلف کے مطابق آزادانہ بحث وتحقیق کا حامی علمی ودعوتی پلیٹ فارم ہے۔ آپ کا تعلق چاہے جس بھی فرقے اور جس بھی جماعت سے ہو یہ پلیٹ فارم آپ کو چند قواعد و ضوابط کا لحاظ رکھتے ہوئے اپنی بات کہنے کی پوری آزادی دیتا ہے۔ ’محدث فورم‘ نے علمی مسائل میں آزادانہ بحث ومباحثہ کا ماحول پیدا کرنے کی بطور خاص کوشش کی ہے جس کی بدولت بہت کم عرصے میں علمی حلقوں میں اسے خاص وقعت کی نظر سے دیکھا جانے لگا ہے۔ آئیے اس کاررواں کا حصہ بنیے اور اختلافی مسائل کو باہمی افہام و تفہیم کے ذریعے حل کرنے میں ہمارا ساتھ دیجئے۔

خصوصیات

محدث میگزین (magazine.mohaddis.com)

’ماہنامہ محدث لاہور‘ امت مسلمہ میں فکری اعتدال کا علمبردار ایک ایسا علمی و تحقیقی مجلّہ ہے جو عرصہ اڑتالیس سال سے علم و ثقافت کے مرکز لاہور سے شائع ہو رہا ہے۔ جس میں قارئین ہر ماہ جدید قانونی، معاشرتی، سیاسی اور علمی موضوعات پر اسلامی نقطہ نظر کی تشریح اور بے لاگ تجزیوں سے مستفید ہوتے ہیں۔ ملت اسلامیہ کو درپیش مسائل و مشکلات اور جدید علمی و فکری چیلنجز کے حوالہ سے ممتاز اہل قلم کی نگارشات پیش کرنا اس رسالہ کا طرہ امتیاز ہے۔ ’ماہنامہ محدث لاہور‘ جہاں مسلکی تعصبات اور فرقہ واریت سے بالاتر ہو کر امت کے مسائل کا شرعی حل پیش کرتا ہے وہیں قرآن و سنت کی بنیاد پر تمام مسالک فکر میں اتحاد و یگانگت اور فکری یکجہتی کا سب سے بڑا داعی ہے۔ فتنہ انکارِ حدیث کی بیخ کنی کرنے اور اس ضمن میں پائے جانے والے تمام تر شبہات کا علمی جائزہ اور رد کرنے میں ’ماہنامہ محدث لاہور‘ ہمیشہ پیش پیش رہا ہے۔ اس کے علاوہ پیش آمدہ مسائل میں جماعت کے نامور علما پر مشتمل فتویٰ کونسل کے جوابات اور رہنمائی بھی فراہم کی جاتی ہے۔ یہ سائٹ عرصہ اڑتالیس سال سے شائع ہونے والے اس علمی واصلاحی مجلے کی یونیکوڈ پر مشتمل سائٹ ہے۔ تاکہ یہ قیمتی سرمایہ محفوظ بھی ہو جائے اور پوری دنیا میں اس کی اشاعت بھی ہو سکے۔اس ویب سائٹ پر ماہنامہ محدث لاہورکے 1970ء سے لیکر اب تک چھپنے والے تمام شمارے یونیکوڈ اور پی ڈی ایف فارمیٹ میں آن لائن مطالعہ اور فری ڈاؤن لوڈنگ کی سہولت کے ساتھ موجود ہیں۔قارئین کی سہولت کے لیے مختلف انداز میں موضوعاتی انڈیکس بھی بنائے گئے ہیں، تاکہ سرچ اور استفادہ آسان سے آسان تر ہو جائے۔

خصوصیات