قرآن مجید اللہ تعالیٰ کی نازل کردہ آخری کتابِ ہدایت ہے اور یہ کتاب اس قدر جامع اور مکمل ہے کہ یہ قیامت تک کے لیے آنے والی نسلوں کی رشد و ہدایت کے لیے کافی ہے ۔نبی کریم ﷺ نے فرمایا کہ اس قرآن کے عجائب کبھی ختم نہیں ہوں گے اور نہ ہی کبھی علماء اس کے علوم سے سیر ہوں گے چنانچہ قرآن مجید کو جس پہلو سے بھی دیکھیں یہ عدیم النظیر ہی نظر آئے گا۔ مختلف ادوار میں مختلف فکری ،علمی اور تحقیقی صلاحیتوں کے حامل لوگوں نے اپنی اپنی کوششیں قرآن کریم کی شرح و توضیح کے میدان میں صرف کی ہیں۔ قرآن مجید کے معجزاتی پہلوؤں میں ایک پہلو یہ ہے کہ ہر دور کی ضروریات اور تقاضوں کے مطابق مختلف اسالیب اور پیرایوں میں اس کی تفاسیر،ترجمہ ،معانی ،تفہیم، و تسہیل کا اور تدریس و تعلیم کے لیے علوم عالیہ وغیرہ کی مدد سے اس پر نصاب سازی کا کام ہوتا رہا ہے۔ اور یہ مبارک سلسلہ ہنوز جاری ہے ۔عصر حاضر میں قرآن مقدس کو عام فہم انداز میں لوگوں کے سامنے پیش کرنے کے لیے خانوں میں ترجمے ،رنگوں اور علامات کے ذریعے ترجمہ پیش کرنے نیز اس کے فہم میں مزید دلچسپی پیدا کرنے کے لیے عربی زبان اور اس کے قواعد پر مشتمل نصاب سازی کے اسالیب اپنائے جا رہے ہیں ۔اس سلسلے میں کئی اہل علم نے تعلیم و تدریس اور تصنیف کے ذریعے کوششیں اور کاوشیں کیں۔فہم قرآن کے سلسلے میں الہدیٰ انٹرنیشنل، ، قرآن انسٹیٹیوٹ،اسلامک انسٹیٹیوٹ،لاہور ،دارالفلاح ،لاہور وغیرہ اور بالخصوص مولانا عطاء الرحمن ثاقب شہید کی خدمات ناقابل فراموش ہیں ۔ زیر نظر کتاب ’’ قرآن فہمی کے بنیادی اصول ‘‘مولانا عبد الغفار حسن ﷫کی ان دو تقاریر کی کتابی صورت ہے جو ’’اسلامیہ کالج ( لائل پور حال فیصل آباد ) اور رباط العلوم الاسلامیہ ،کراچی میں کی گئیں اور پھر مجلہ المنبر (۲۰۰۷) فروری ۱۹۶۲ء ) اور میثاق (نومبر ۱۹۸۵ء ) کے شماروں کی زینت بھی بنیں۔ اس رسالے میں فہم قرآن کے موضوع پر تمام نکات کا احاطہ کیا گیا ہے اور مقاصد قرآن پر بھی اختصار کے ساتھ کلام کیا گیا ہے اور آخر میں ڈاکٹر سہیل حسن حفظہ اللہ کا ایک وضاحتی مضمون بھی شامل اشاعت ہے جس میں تعامل امت کے مبحث پر اٹھائے گئے چند تنقیدی اعتراضات کا جائزہ لیا گیا ہے۔(م۔ا)