یزید، سیدنا امیر معاویہ رضی اللہ عنہ کا بیٹا تھا، ان کے بعد مومنوں کا حکمران تھا۔ کئی صحابہ کرام رضی اللہ عنہم نے اس کی بیعت کی تھی۔ علماء نے حدیث « أَوَّلُ جَيْشٍ مِنْ أُمَّتِي يَغْزُونَ مَدِينَةَ قَيْصَرَ مَغْفُورٌ لَهُمْ ....»(صحيح بخاری: 2924) کا مصداق اسے قرار دیا ہے کہ یہ اس لشکر کا قائد تھا۔ تاہم یزید کے دور میں بہت سارے فتنوں کی وجہ سے اس کے بارے میں اہل علم کی آراء مختلف ہیں۔ چونکہ یزید کے متعلق کتب سیر و تاریخ میں تمام طرح کی تاریخی روایات موجود ہیں لہذا شیخ الاسلام ابن تیمیہ رحمہ اللہ وغیرہ نے اس کے بارے میں سکوت اختیار کیا ہے اور یہی موقف احوط ہے واللہ اعلم! زیر نظر کتاب ’’حیات سیدنا یزید‘‘ ابو الحسین محمد عظیم الدین صدیقی صاحب کی تصنیف ہے انہوں نے اس کتاب میں کتب تاریخ کی ورق گردانی کر کے یزید بن معاویہ کے حالاتِ زندگی یکجا کئے ہیں۔ مصنف نے پوری کوشش کی ہے کہ یزید سے متعلق واقعات کو تسلسل اور سیرت کے طور پر مرتب کیا جائے اور ساتھ ہی یزید سے متعلق جو غلط فہمیاں کتبِ تاریخ میں شامل ہو گئی ہیں، ان کا ازالہ بھی کیا جائے۔ کتاب اپنے مندرجات کے لحاظ سے وقیع معلومات پر مشتمل ہے۔(م۔ا)