اصول ِتفسیر ایسے اصول و قواعد کا نام ہے جو مفسرین قرآن کے لیے نشان ِمنزل کی تعیین کرتے ہیں۔ تاکہ کلام اللہ کی تفسیر کرنے والا ان کی راہنمائی اور روشنی میں ہر طرح كی تفسیری خطا سے محفوظ رہے اور اس کے منشاء و مفہوم کا صحیح ادراک کر سکے۔اصول تفسیر میں شیخ الاسلام امام ابن تیمیہ کی کتاب مقدمہ فی اصول تفسیر اور حجۃ الاسلام شاہ ولی اللہ محدث دہلوی کی کتاب الفوز الکبیر اپنے موضوع میں بڑی اہم کتب ہیں ۔دونوں کتابیں مدارس و جامعات کے نصاب میں شامل ہیں۔ زیر نظر کتاب ’’ الخیر الکثیر ‘‘ اصول تفسیر پر شاہ ولی اللہ محدث دہلوی رحمہ اللہ کی معروف کتاب ’’الفوز الکبیر‘‘ کی اردو شرح ہے مولانا مفتی محمد امین بن یوسف پالن پوری شارح ہیں ۔فوز الکبیر میں قرآن مجید کی تفسیر کے تمام بنیادی اصول پر مفصل اور بصیرت افروز بحث کی گئی ہے۔ یہ کتاب فنِّ اصولِ تفسیر میں نہایت ہی جامع اور مختصر اور نادر اصول و ضوابط سے پُر ہے فہمِ قرآن کے حوالے سے تنہا اس کتاب کا مطالعہ، بہت سی اصول تفسیر کی کتابوں اور تفسیروں کے مطالعے سے بے نیاز کر دیتا ہے ۔ شاہ صاحب نے اصلًا یہ کتاب فارسی زبان میں لکھی تھی۔کتاب الفوز الکبیر صرف برّصغیر بلکہ عرب اور افریقی و یورپی ممالک میں بھی متعارف ہے اس لیے اس کی متعدد اہل علم نے اس کے عربی و اردو زبان میں ترجمہ و شروحات تحریر کی ہیں۔(م۔ا)
