اسلامی ریاست کا قیام جو مدینہ منورہ کی بستی سے شروع ہوا اور پوری دنیا پر پھیل گیا اور اسلامی ریاست کے اندازِ حکومت نے دنیا کو ششدر کر کے رکھ دیا۔اور دنیا کو پرامن معاشرے کی راہ دکھائی۔دور حاضر میں بھی اس بات کی ضرورت ہے کہ اسلام اور اسلامی ریاست کے ارتقاء اور قیام کی تعلیمات کو عام کیا جائے تاکہ انسانیت اس سے مستفید ہو سکے ۔ اسی غرض سے اکثر تعلیمی اداروں میں ایسے مضامین شامل نصاب کیے جا چکے ہیں جو اسلام کی اشاعت اور اسلام ریاست کے قیام میں معاونت کر سکیں اور نسلِ نو اسلام اور اسلامی ریاست کی خصوصیات سے واقفیت حاصل کر سکے۔ چنانچہ جب خیبر پختوخواہ کی تمام یونیورسٹیوں ایم اے اسلامیات کے نصاب میں ایک مضمون ’’اسلام اور مسلم دنیا‘‘ کے عنوان سے شامل کیا جس کے لیے کوئی مستقل کتاب موجود نہیں تھی تو مولانا محمد نعیم صدیقی حفظہ اللہ نے زیر نظر کتاب بعنوان ’’اسلام اور مسلم دنیا‘‘ مرتب کی ۔ جسں میں مندرجہ ذیل عنوانات کو زیر ِ بحث لایا گیا ۔ اسلامی ریاست کا ارتقاء،عالم اسلام کے وسائل، مسلم امہ کے اتحاد کی ضرورت اور تجاویز،اسلامی ممالک میں اسلامی جمہوریہ پاکستان کی مذہبی ، سیاسی اور اقتصادی اہمیت اور مختلف اسلامی ممالک کا تاریخی پس منظر اور ان کے مسائل ، خصوصاً الجزائر، فلسطین، کشمیر، وسطی ایشیاء کی نو آزاد ریاستیں، روس کے افغانستان کے انخلاء کے بعد کے حالات اور طالبان حکومت، سعودی عرب، مصر، شام ، ترکی اور ایران وغیرہ کے اقتصادی ، ثقافتی اور مذہبی حالات اور ان کے پاکستان کے تعلقات،یورپ میں آباد مسلمان کی مذہبی آزادی، مسائل اور ان کا معاشرتی کردار، غیر مسلم ممالک میں مسلم اقلیتوں کے مسائل، علاقائی اور عالمی سطح پر اسلامی تنظیموں کا مسلمانوں کے مسائل کے حل کے لیے کردار ۔(م۔ا)